In s'accampamentu de Selema dae ss'umbra de sos pinos ch'essies derettu a su mare de Santa Luchia, a un'ispiaggia de arena fine e bianca che sa tela. A pacos passos accattaes unu biddizzolu, chi si nat semper Santa Luchia, naschìu pro manu de sos piscadores.

Est unu locu incantau inube si podet istare dae aprile a capidanne, godinde paris chin sa distinta gentilesa nostra finzas tottu su chi serbit a cussa casta de turistas chi cheren godire de sa bellesa 'e ssu locu naturale, senza li facher mancare nudda de sos cuntentos de sa modernidade.

B'at prattas mannas e bene mantesas pro sas tendas, b'at dommeddas de muru e roulottes postas in bellos meriacros friscorosos, e in prus comodidades pro tottu sos gustos. B'at un'apposentu ube manicare chin bravos cuchineris chi cochen cosa sarda, unu bellu zilleri e una brazza manna chin jocos pro sos crios, a inghiriu inghiriu b'at locu comodu pro istare assoliandesi senza che falare a ss'ispiaggia. Pro chie si cheret facher a manicare a contu suo s'accattat una butteca furnìa de tottu, finzas chin mercanzia pro sas fainas de domo.

Paris chin custu b'at tottu su chi serbit pro si labare sa carena in grassia 'e deus e pro facher s'isteriu, chin abba caente in tottube. In contu 'e abba bos podimus narrer chi su bantu nostru est de aere, a banda de sa linea 'e ss'abba munizipale, unu bellu poiu 'e abba tottu nostru, in sa tanca de famillia, chi nos dat abba bona tottu s'annu.

Amus pessau e istudiau meda pro nde facher unu locu sicuru pro sos crios, sende chi b'at medas famillias chi benin a inoche chin pizzinnos minores. B'at de narrer chi sa sicuresa est garantìa pro tottus, mannos e minores, ca sas regulas postas da 'e sas lezzes inoche sun tottu rispettadas.

Un'attera cosa de importu est chi s'arribbat a unu duttore e a unu farmacista ponende pacos passos a pede, in sa bidda de Santa Luchia.

Non mancan locos pro facher isport, chi siat tennis o pallone, mentres pro andare a cabaddu. E pro chie cheret andare issuta 'e modde o si facher un'issia chin sas barcas basta de pedire, ca nos semus accordaos chin attere chi fachen custos servizios.

Pro sos furisteris chi benin chin sos camper bi sun sos locos bene ammanios pro los accullire (a che isbodiare su commodu, a facher sa provvista dess'abba e tottu su chi serbit). Itte b'amus galu de bos contare? Sa cosa chi prus ispantat sos istranzos chi benin a inoche est sa bellesa de s'ispiaggia, chi risultat una de sas prus mannas de Sardinnia, paris chin su crarore de s'arena, chi lassat a bucca aperta. Tottu est chi benezas a inzertare. Chin salude.




40.57858°N, 9.77274°E